இலங்கை மற்றும் இந்தியா இடையிலான டிஜிட்டல் ஒத்துழைப்பை மேலும் வலுப்படுத்தும் நோக்கில், டிஜிட்டல் பொருளாதார பிரதி அமைச்சர் பொறியியலாளர் எரங்க வீரரத்ன தலைமையிலான தூதுக்குழுவினர், இந்திய உயர்ஸ்தானிகர் மேதகு சந்தோஷ் ஜா அவர்களை இந்திய இல்லத்தில் (India House) சந்தித்து விசேட கலந்துரையாடலில் ஈடுபட்டனர்.
இந்த சந்திப்பில் டிஜிட்டல் பொருளாதாரம் குறித்த ஜனாதிபதியின் சிரேஷ்ட ஆலோசகரும் தகவல் மற்றும் தொடர்பாடல் தொழில்நுட்ப முகவர் நிறுவனத்தின் (ICTA) தலைவருமான கலாநிதி ஹான்ஸ் விஜயசூரிய மற்றும் டிஜிட்டல் பொருளாதார அமைச்சின் செயலாளர் வருண ஸ்ரீ தனபால ஆகியோரும் கலந்துகொண்டனர்.
முக்கிய கலந்துரையாடல் விடயங்கள்: தொழில்நுட்ப ஆளுகை: புதுடில்லியில் நடைபெற்ற செயற்கை நுண்ணறிவு (AI) உச்சிமாநாட்டை அடிப்படையாகக் கொண்டு, உலகளாவிய தரத்திற்கு அமைவான வலுவான ஆளுகைக் கட்டமைப்புகளுடன் கூடிய தொழில்நுட்ப-சட்ட அணுகுமுறையைப் பின்பற்றுவதன் முக்கியத்துவம் குறித்து இரு தரப்பினரும் அவதானம் செலுத்தினர்.
AI மற்றும் தரவு மையங்கள்: தரவு மையங்கள் (Data Centers) மற்றும் செயற்கை நுண்ணறிவு உட்கட்டமைப்பு மேம்பாடு குறித்து இங்கு விசேட கவனம் செலுத்தப்பட்டது. இலங்கையில் நிறுவப்பட முன்மொழியப்பட்டுள்ள 'AI வலயத்தில்' முதலீடு செய்ய இந்திய முதலீட்டாளர்கள் மிகுந்த ஆர்வத்துடன் இருப்பதாக உயர்ஸ்தானிகர் சுட்டிக்காட்டினார்.
டிஜிட்டல் பொது உட்கட்டமைப்பு (DPI): இந்தியாவின் 'PM Gati Shakti' திட்டத்தை முன்மாதிரியாகக் கொண்டு, செயற்கைக்கோள் தரவு மூலம் உட்கட்டமைப்பு திட்டமிடல், பேரிடர் மேலாண்மை மற்றும் குறிப்பாக மீனவ சமூகத்தின் நடவடிக்கைகளை மேம்படுத்துவதற்கான டிஜிட்டல் கட்டமைப்புகளை உருவாக்குவது குறித்து விரிவாக ஆலோசிக்கப்பட்டது.
கூட்டுச் செயல்பாட்டுக் குழு (JWG): இரு நாடுகளுக்கும் இடையிலான புரிந்துணர்வு ஒப்பந்தத்தின் கீழ், கூட்டுச் செயல்பாட்டுக் குழுவைச் சுறுசுறுப்பாக்கி, அறிவுசார் சொத்துரிமைகளைப் பாதுகாப்பதன் மூலம் ஒரு முறையான ஒத்துழைப்பை உருவாக்க இணக்கம் காணப்பட்டது.
கல்வி மற்றும் தொழில்முனைவோர் மேம்பாடு: இலங்கையின் சிறு மற்றும் நடுத்தர அளவிலான தொழில்முனைவோரை (SMEs), இந்தியாவின் NASSCOM போன்ற முன்னணி நிறுவனங்களுடன் இணைப்பது மற்றும் இரு நாடுகளுக்கும் இடையிலான பொருளாதார மற்றும் தொழில்நுட்ப ஒத்துழைப்பு ஒப்பந்தத்தை (ETCA) விரைவுபடுத்துவது குறித்தும் கருத்துக்கள் பரிமாறப்பட்டன.
கல்வித் துறையை டிஜிட்டல் மயமாக்கும் நோக்கில், நாடு முழுவதும் ரோபோட்டிக்ஸ் மற்றும் கோடிங் (Coding) கல்வியைப் பரப்ப 'Tinkering Labs' மற்றும் AI கற்றல் மையங்களை அமைக்க இந்தியாவின் ஆதரவைப் பெற முன்மொழியப்பட்டது. நவீன தொலைத்தொடர்பு ஆராய்ச்சிக்காக இந்தியாவின் 'Bharat 6G Mission' திட்டத்துடன் இலங்கை இணைவதற்கான சாத்தியக்கூறுகள் குறித்தும் ஆராயப்பட்டது.
ஆராய்ச்சி மற்றும் அபிவிருத்தி (R&D): இந்தக் கலந்துரையாடலின் மிக முக்கியமான முடிவாக, இலங்கைப் பல்கலைக்கழகங்களுக்கும் இந்தியாவின் IIT Madras போன்ற முன்னணி நிறுவனங்களுக்கும் இடையே ஆராய்ச்சி மற்றும் வர்த்தகமயமாக்கல் பங்களிப்பை உருவாக்கத் தீர்மானிக்கப்பட்டது. இதன் மூலம் இலங்கையின் பொறியியல் திறன்களை சர்வதேச தரத்திற்கு உயர்த்துவதற்கும், தொழில்நுட்பப் பரிமாற்றங்களை வலுப்படுத்துவதற்கும் வாய்ப்பு ஏற்படும். தரம், பாதுகாப்பு மற்றும் புத்தாக்கம் ஆகியவற்றை அடிப்படையாகக் கொண்ட இந்த நிலையான கூட்டாண்மை மூலம், இலங்கையை பிராந்தியத்தின் போட்டித்தன்மை மிக்க டிஜிட்டல் மையமாக மாற்றுவதற்கான பணிகள் மேலும் வலுவடையும்.
